आफू पक्षका लाई खाली कागजमा हस्ताक्षर गराउदै महन्थ ठाकुर : बहुमत हस्ताक्षर प्रधानमन्त्री लाई बुझाउने तयारी

बैकल्पिक खवर

काठमाडौं / जनता समाजवादी पार्टी (जसपा) नेपालभित्र पूर्व राजपा र पूर्व समाजवादी पक्षबीच शक्ति संघर्ष चर्किरहेका बेला अध्यक्ष महन्थ ठाकुरले आफ्नो पक्षमा रहेका केन्द्रीय कार्यकारिणी समिति सदस्य र सांसदको हस्ताक्षर संकलन गरेका छन् । श्रोतका अनुसार बहुमत हस्ताक्षर संकलन गरेर प्रधानमन्त्री केपि शर्मा ओलि लाई बुझाउने तयारी स्वरुप आफू पक्षका लाई कार्यलयमै बोलाएर हस्ताक्षर संकलन गरिएको हो ।

सोमवार पूर्व राजपाको बबरमहलस्थित कार्यालयमा बोलाएर खाली कागजमा हस्ताक्षर गर्न लगाएको केन्द्रीय कार्यकारिणी समितिका एक सदस्यले बताए । उनका अनुसार हस्ताक्षरको प्रयोजन ठाकुरले खुलाएका छैनन् ।

ठाकुरले आइतवार राजधानीबाहिर रहेका पार्टी केन्द्रीय कार्यकारिणी समिति सदस्य र सांसदलाई टेलिफोन गरेर सोमवारसम्म राजधानी आइपुग्न भनेका थिए । तत्कालीन राजपा अध्यक्षमण्डलका सदस्य समेत रहेका नेता महेन्द्र राय यादवसहित ३ केन्द्रीय कार्यकारिणी सदस्यले अर्का अध्यक्ष उपेन्द्र यादव पक्षलाई साथ दिएपछि ठाकुर पक्ष पार्टीभित्र अल्पमतमा परेको छ ।

‘केन्द्रीय कार्यकारिणी समितिका २ दर्जन सदस्यले आजै हस्ताक्षर गरिसक्नुभएको छ,’ पूर्व राजपाका एक नेताले भने, ‘भोलि बाँकीलाई बोलाएर हस्ताक्षर गराउने योजना छ ।’

५१ सदस्यीय केन्द्रीय कार्यकारिणी समितिमा पूर्व राजपाका २६ र पूर्व समाजवादीका २५ सदस्य छन् । लुम्बिनी प्रदेशका ४ सांसदलाई कारबाही गर्ने र प्रधानमन्त्री केपी शर्मा ओलीविरुद्ध अविश्वास प्रस्ताव दर्ता गर्ने सम्बन्धमा भएका निर्णयमा अध्यक्ष यादव, संघीय परिषद् अध्यक्ष बाबुराम भट्टराईसहित २६ जनाको हस्ताक्षर थियो । घरघरमा हस्ताक्षर गराएर बस्दै नबसेको केन्द्रीय कार्यकारिणी समितिको बैठक भनी गरिएको निर्णय फर्जी भएको आरोप ठाकुर पक्षको छ ।

ठाकुरले पनि त्यस्तै कदम अघि बढाउन खोजेको भन्दै पूर्व राजपाका केही नेताले असन्तुष्टि जनाएका छन् ।

ठाकुरले हस्ताक्षर गराउनुका पछि ४ वटा विषयलाई जोडेर हेर्ने गरिएको छ । उनको पहिलो प्राथमिकता केन्द्रीय कार्यकारिणी समितिमा गुमेको बहुमत फर्काउने छ । अर्का अध्यक्ष यादवलाई साथ दिएका पूर्व राजपाका तीनै जना सदस्यलाई आफ्नो पक्षमा तान्ने कोसिस उनको छ । बहुमत पुर्‍याएर लुम्बिनी प्रदेशमा ४ प्रदेश सांसदमाथि गरिएको कारबाही फुकुवा गराउने योजना पनि उनले बनाएका छन् ।

दोस्रो, ठाकुर पार्टीको संसदीय दलको नेता बन्न इच्छुक देखिन्छन् । कुनै पनि बेला संसदीय दलका नेता हुन उनले बहुमत जुटाउन कोसिस गरेका हुन् । आफू निकटहरूसँगको कुराकानीमा संसदीय दलमा बहुमत सांसदले आफूलाई साथ दिने विश्वास उनले व्यक्त गर्न गरेका छन् ।

दलमा महेन्द्र राय यादवले उपेन्द्र पक्षलाई साथ दिएपछि पूर्व राजपाबाट १५ जना सांसद मात्रै छन् । पूर्व समाजवादीमा भने १७ जना सांसद पुगेका छन् । दुवैतर्फ १र१ जना निलम्बनमा छन् । अहिलेसम्म पूर्व समाजवादी सांसद कसैले पनि ठाकुरको पक्ष लिइसकेका छैनन् । तर ठाकुर पक्षले ४–६ जनासम्म पूर्व समाजवादी सांसद आफ्नो पक्षमा आउने दाबी गरेको छ ।

तेस्रो, प्रधानमन्त्री केपी शर्मा ओलीले संसद्मा राखेको विश्वासको प्रस्तावमा समर्थन दिने प्रयोजनका लागि उनले हस्ताक्षर गराएका हुन् । ठाकुर पक्षले ओली नेतृत्वकै सरकारलाई साथ दिन चाहेको छ । पार्टी र संसदीय दलमा बहुमत पुर्‍याएर ओलीलाई साथ र समर्थन दिने गरी निर्णय गराउन चाहेको बुझाइ समेत कतिपयको छ ।

चौथो, पार्टीमा बहुमत पुगेन भने राजपालाई ब्युँताउने योजनामा ठाकुर सहितका नेता छन् । त्यसका लागि पार्टी केन्द्रीय कार्यकारिणी समिति र संसदीय दलमा ४० प्रतिशतको संख्या आवश्यक पर्छ । पूर्व राजपाको पार्टी र संसदीय दल दुवैतिर ४० प्रतिशतभन्दा बढी हिस्सा छ । ‘उपेन्द्रसँग मिल्ने अवस्था बनेन र बहुमत पनि पुगेन भने पार्टी विभाजन गराएर ओली नेतृत्वकै सरकारमा जाने सम्भावना समेत देखिन्छ,’ ठाकुरनिकट स्रोतले भन्यो, ‘मर्ता त क्या कर्ता भन्ने स्थितिमा पुग्ने अवस्था बन्दै गएको छ ।’

प्रधानमन्त्री ओलीले आफ्नो नेतृत्वको सरकारको समर्थन जनाउन ठाकुर पक्षले उठाउँदै आएको मधेश र थरुहट आन्दोलनका क्रममा जेल परेका कार्यकर्ताको रिहाइ र मुद्दा फिर्ताको माग कार्यान्वयनमा लगेका छन् । जसपाभित्र ठाकुर पक्षलाई बलियो बनाउन प्रधानमन्त्री ओली समेत लागेको पूर्व समाजवादी धारका नेताहरू बताउँछन् ।

पूर्व राजपाका हाल कायम १५ सांसदले साथ दिँदा ओली नेतृत्वको सरकार जोगिन सक्ने देखिएको छ । प्रतिनिधि सभामा पछिल्लोपटक दल त्यागको आरोपमा माओवादी केन्द्रबाट निर्वाचित ४ जनाले सांसद पद गुमाएका छन् । कांग्रेस र जसपाका २–२ सांसद निलम्बनमा छन् । कायम रहेका सांसदको संख्या २६७ हुन्छ ।

त्यसको बहुमत अर्थात् ओली नेतृत्वको सरकार टिकाउन १३४ सांसद आवश्यक पर्छ । एमालेसँग १२१ सांसद छन् । ‘ठाकुरले गराइरहेको हस्ताक्षर कतै ओली नेतृत्वकै सरकारलाई समर्थन जनाउन र सरकारमा सहभागी हुनेसम्मको निर्णय गराउन हो कि भन्ने आशंका पनि छ,’ पूर्व राजपाका एक नेताले भने । समाचार आजको कान्तिपुर दैनिकमा प्रकाशित छ ।

मङ्गलबार, २१ बैशाख, २०७८, बिहानको १०:१७ बजे

सम्बन्धित खवर