कि वार कि पारको लडाईंमा एमाले, आज निर्णायक बैठक

काठमाडौं, १७ साउन/ नेकपा एमालेको स्थायी कमिटी बैठक आज बस्दैछ । बैठक आज अपराह्न ३ बजे तुलसीलाल अमात्य स्मृति प्रतिष्ठानमा बस्न लागेको एमाले केन्द्रीय कार्यालयका सचिव शेरबहादुर तामाङले जानकारी दिए ।

आजको बैठकमा पार्टीको विधान अधिवेशनको तयारी, विभागहरुलाई पूर्णतालगायतका विषयमा छलफल हुने तामाङले बताए । उनका अनुसार पार्टी विवाद समाधानका लागि भन्दै गठित कार्यदलले तयार पारेको १० बुँदे सहमतिको प्रस्तावबमोजिम बैठकमा विभिन्न आयोगहरु गठन, केन्द्रीय विभागहरुको पूर्णता र प्रदेश कमिटीहरुको अनुमोदनबारे पनि छलफल हुनेछ ।

यसअघि माधव नेपाल पक्षलाई पनि सहमतिमा ल्याउने प्रयासस्वरूप शनिबार स्थगित बैठक गरिएको थियो । आज बैठक बस्नुअघि नेपाल पक्षलाई पनि सहमतिमा ल्याउन दोस्रो तहका नेताहरु लागि परेका छन् । सहमतिको प्रयासमा शनिबार बैठक स्थगित गरेर नेता नेपाललाई भेट्न कोटेश्वर पुगेका विघटित कार्यदलका सदस्यलाई समेत नेपालले १० बुँदे नजान्ने र ओलीलाई अध्यक्ष पनि नमान्ने अडान सुनाएको नेताहरुले बताए छन् ।

तर, शनिबार नै पार्टीको काठमाडौं जिल्ला कमिटी बैठकमा अध्यक्ष केपी शर्मा ओलीले माधव नेपाललाई पार्टीमा ठाउँ नरहेको दोहोर्‍याए भने नेता नेपालले अखिल फोर्सको मार्चपासपछिको सभालाई सम्बोधन गर्दै ओलीलाई फेरि प्रधानमन्त्री बन्ने जालझेल नगर्न चेतावनी दिएका थिए ।

यता ओलीले आजको बैठकअघि सहमतिमा नआए ‘वारपार’ गरेर अघि बढ्ने निकट नेताहरुलाई बताइसकेकाले आजको बैठक निर्णायक हुन सक्ने अनुमान गरिएको छ ।

आज पनि एमालेको विघटित कार्यदलमा रहेका सदस्यहरु भीम रावल, विष्णु पौडेल, सुवास नेम्वाङ, गोकर्ण विष्ट लगायतका नेताहरु ओली र नेपाललाई वार्ता गराउने प्रयासमा जुटेका छन् ।

ओली र नेपालपछिका दोस्रो, तेस्रो तहका कतिपय नेताहरुसमेत अब एमाले एकताको अध्याय पुरा भएकाले ‘वारपार’ नै गरेर अघि बढ्नु पर्ने बताउन थालेका छन् ।

महासचिव ईश्वर पोखरेलले सहमतिमा नआए नेपाललाई पर्खेर सधैँ पार्टी नबस्ने बताएका छन् भने नेतृ रामकुमारी झाँक्रीले अध्यक्ष पदबाट ओलीको राजीनामा आए मात्रै एकता हुने बताएकी छन् ।

०७७ फागुन २३ मा सर्वोच्च अदालतले एमाले ब्यूँताएपछि ०७५ जेठ २ अघिको अवस्थाबाट पार्टी अघि बढाउनु पर्ने मागसहित एमालेको नेपाल पक्ष संघर्षरत छ ।

तर, आफ्नै पार्टीको सरकार ढालेर देउवालाई प्रधानमन्त्री बनाउँदा पनि कार्यदलमा भएको १० बुँदे सहमतिबमोजिम पार्टी अघि बढाउँदा सहमतिमा नआएको भन्दै नेपालसँग संस्थापन पक्ष सन्तुष्ट छैन ।

आइतबार, १७ साउन, २०७८, बिहानको ०९:२६ बजे

सम्बन्धित खवर