भद्रपुर नाका अविलम्ब खुलाउन उद्योगी व्यवसायीको माग

झापा. १८ भाद्र/  सरकारले भद्रपुरलगायत दक्षिणी भेगका बासिन्दाले उपेक्षा गरेको भन्दै यहाँका उद्योगी व्यवसायीले सरकारलाई गम्भीर ध्यानाकर्षण गराएका छन् ।

सरकारले भद्रपुर नाकाबाट आउ–जाउलाई सहज नबनाएको प्रति चिन्ता व्यक्त गर्दै झापा उद्योग वाणिज्य संघ र झापा उद्योग सङ्घले छुट्टाछुट्टै ज्ञापनपत्र बुझाउँदै सो नाका अविलम्ब सहज बनाउन सरकारसँग माग गरे । संघका अध्यक्ष नवराज पनेरुको नेतृत्वमा बिहीबार जिल्ला प्रशासन कार्यालय झापा पुगेका उद्योगी–व्यवसायीहरूको टोलीले प्रमुख जिल्ला अधिकारीमार्फत प्रधानमन्त्री शेरबहादुर देउवालाई ज्ञापनपत्र पठाउँदै भद्रपुर क्षेत्रका उद्योगी–व्यवसायी एवम् सर्वसाधारण नागरिकले पछिल्लो डेढ वर्षदेखि झेल्दै आएको समस्याप्रति गम्भीर भई भद्रपुर नाकाबाट आवत–जावत सहज बनाइदिन माग गरेको हो । संघका अध्यक्ष पनेरुले प्रमुख जिल्ला अधिकारी श्रवणकुमार तिमिल्सिनालाई ज्ञापन–पत्र बुझाएका हुन् ।

प्रजिअ तिमिल्सिनाले ज्ञापनपत्र बुझ्दै तत्काल सम्बन्धित निकायहरूमा पठाउने प्रतिबद्धता व्यक्त गर्दै आफूबाट हुनसक्ने पहलकद्मी गर्ने आश्वासन दिए । सो ज्ञापनपत्र गृह मन्त्रालय, अर्थ मन्त्रालय, झापा ३ नं. क्षेत्रका प्रतिनिधिसभा सदस्य राजेन्द्रप्रसाद लिङ्देन, प्रदेशसभा सदस्य बसन्त बानियाँ, पूर्णप्रसाद राजवंशी, ओमप्रकाश सरावगी तथा भद्रपुर नगरपालिकासमेतलाई बोधार्थ पठाई भद्रपुर नाकाबाट आउ–जाउलाई सहज बनाउन पहल गरिदिन आग्रह गरिएको अध्यक्ष पनेरुले बताए ।

त्यस्तै झापा उद्योग संघ जिल्ला कार्य समितिले पनि बुधवार प्रधानमन्त्री शेरबहादुर देउवालाई ज्ञापनपत्र पठाएको छ । झापा उद्योग संघका अध्यक्ष यमबहादुर श्रेष्ठको नेतृत्वमा गएको टोलीले प्रमुख जिल्ला अधिकारी श्रवणकुमार तिमिल्सिनालाई सो मागसहितको ज्ञापनपत्र बुझाएको हो । टोलीमा नेपाल उद्योग वाणिज्य संघ प्रदेश १का अध्यक्ष टीकाराज ढकाल, उद्योग संघका झापा उपाध्यक्ष दीपेश ढकाल, सचिव प्रदीपमणि रेग्मी र सदस्य बिनय गोयल सहभागी थिए ।

ज्ञापनपत्रमा भनिएको छ– आम नागरिक र उद्योगी–व्यसायीहरुको आवश्यकता, चाहना एवम् व्यवहारिक पक्षलाई ध्यानमा राख्दै भारतको गलगलियासँग जोडिएको भद्रपुर नाका सहज बनाइदिनुहुन प्रधानमन्त्रीज्यूसँग आग्रह गर्दै यसका लागि पहलकदमी र सहजीकरण गरिदिनु हुन सरोकारवाला निकाय तथा माननीय जनप्रतिनिधिज्यूहरू समक्ष जोडदार माग गर्दछौँ ।’ भद्रपुर देशकै पनि ऐतिहासिक व्यापारिक केन्द्र हो । ०५०को दशकसम्म ठूलो परिमाणमा भद्रपुर नाकाबाटै सामान आयात–निर्यात हुन्थ्यो ।

काँकरभिट्टामा पुल बनेपछि मात्र त्यहाँबाट आयात–निर्यात हुन थालेको हो । त्यसपछि क्रमशः सुस्ताउँदै गएको भद्रपुरमा लामो प्रयासपछि मेची पुल निर्माण सम्पन्न भई सञ्चालनमा आइसकेको र छोटी भन्सारको रुपमा रहेको भद्रपुर भन्सार स्तरोन्नति भई मूल भन्सारमा रूपान्तरण भइसकेको परिप्रेक्ष्यमा भद्रपुरमा व्यापार–व्यवसायको चहलपहल बढाउन नाकाबाट आवागमनमा सहजता ल्याउन मात्र नभई दुवैतर्फको एप्रोच सडकलाई पूर्णता दिई भन्सारलाई थप सुविधायुक्त बनाउनुपर्ने देखिन्छ । यथाशक्य चाँडो भद्रपुर नाकाबाट आवागमन सहज नभए दबाबमूलक कार्यक्रम गर्न बाध्य हुने ज्ञापनपत्रमा उल्लेख छ ।

शुक्रबार, १८ भदौ, २०७८, साँझको ०५:११ बजे

सम्बन्धित खवर