निर्वाचन आयोगद्वारा उम्मेद्वारलाई चुनाव चिह्न प्रदान

निर्वाचन आयोगले आगामी माघ ९ गते हुने राष्ट्रियसभा निर्वाचनका लागि उम्मेदवारहरुको अन्तिम नामावली प्रकाशन गरेको छ।

साथै आयोगले उम्मेदवारहरुलाई निर्वाचन चिह्न पनि प्रदान गरेको छ।

निर्वाचन आयोगमा अनुसार हिजो शुक्रबार बिहान १० बजेदेखि दिउँसो १ बजेसम्म उम्मेदवारका अन्तिम नामावली प्रकाशन गरिएको थियो भने १ बजेदेखि अपराह्न ४ बजेसम्म निर्वाचन चिह्न प्रदान गरिएको थियो छ।

आयोगका अनुसार यस निर्वाचनमा नेपाल कम्युनिष्ट पार्टी नेकपाका १६, नेपाली कांग्रेसका १६, समाजवादी पार्टीका ७, राष्ट्रिय जनता पार्टी नेपालका २, नेपाल मजदुर किसान पार्टीका २ र राष्ट्रिय जनमोर्चा पार्टीका २ गरी जम्मा ४५ उम्मेदवारले भाग लिएका छन्।

त्यस्तै उम्मेदवारहरुलाई सम्बन्धित पार्टीको निर्वाचन चिह्न प्रदान गरिएको निर्वाचन आयोगले जनाएको छ।

आयोगका अनुसार सातवटा प्रदेशमा महिला समूहतर्फ ७, दलित समूहतर्फ २, अपाङ्गता भएका व्यक्ति या अल्पसंख्यक समुदाय समूहतर्फ २ र अन्य समूहतर्फ ७ गरी जम्मा १८ रिक्त पदका निर्वाचन हुन लागेको हो।

जसमा महिला समूहतर्फ १६, दलित समूहतर्फ ५, अपाङ्गता भएको व्यक्ति वा अल्पसंख्यक समुदाय समूहतर्फ ५ र अन्य समूहतर्फ १९ जना उम्मेदवारको उम्मेदवारी परेको निर्वाचन आयोगका सहसचिव एवम् प्रवक्ता राजकुमार श्रेष्ठले जानकारी दिए।

राष्ट्रियसभामा आगामी फागुन एक तिहाई अर्थात् १९ जना सदस्यको पदावधि सकिँदैछ। जसमध्ये १८ जनाका लागि निर्वाचन हुनेछ भने १ जना सदस्य सरकारको सिफारिसमा राष्ट्रपतिले नियुक्त गर्ने संवैधानिक व्यवस्था छ।

नेपालको संविधानअनुसार राष्ट्रियसभाका सदस्यको पदावधि ६ वर्षको हुन्छ। संविधानको धारा ८६ (३) बमोजिम प्रत्येक दुई वर्षमा पदावधि समाप्त भई रिक्त हुने राष्ट्रियसभाका एक तिहाइ सदस्यका निर्वाचन हुन लागेको हो।

संविधान निर्माणपछि बनेको पहिलो राष्ट्रिय सभाको कार्यकाल भने गोलाप्रथाद्वारा २ वर्ष, ४ वर्ष र ६ वर्ष निर्धारण गरिएको छ। स्थायी सदनका रूपमा परिकल्पना गरिएको राष्ट्रिय सभा ५९ सदस्यीय छ।

 

शनिबार, २६ पुष, २०७६, बिहानको ०६:४६ बजे

सम्बन्धित खवर