‘बम’ राखेर तीन करोड फिरौती

झापा, २८ भाद्र /  नक्कली बम राखेर आतंक फैलाएको आरोपमा ३ जनालाई काठमाडौं प्रहरीले पक्राउ गरेको छ ।

पक्राउ परेका काठमाडौं फुटुङ्गका आशिष कुँवर, अभिषेक कुँवर र रोल्पा कुतेलीका अम्मरबहादुर रोका मगरलाई महानगरीय प्रहरी परिसर काठमाडौले आइतबार पत्रकार सम्मेलनमार्फत सार्वजनिक गरेको छ ।

उनीहरुले फिरौती असुल्ने प्रयोजनका लागि आतंक फैलाएको पाइएको महानगरीय प्रहरी परिसरका प्रमुख अशोक सिंहले बताए । यही भदौ २४ गते राजधानीको बानेश्वर मैतीदेबी सडकखण्डमा रहेको आँखा उपचार केन्द्रको तेश्रो तल्लाको शौचालयमा उनीहरुले शंकास्पद बस्तु राखेको बताइएको छ । सहकारीबाट लिएको १७ लाख रुपैयाँ तिर्ने पैसा जुटाउन यस्तो कार्य गरेको अभियुक्तहरुले प्रहरीलाई बयान दिएका छन् ।

पक्राउ परेकामध्ये आशिषले सोही अस्पतालमा आँखाको शल्यक्रिया गराएका थिए । त्यसक्रममा उनी अस्पताल प्रशासन र डाक्टरहरुसँग परिचित भएका थिए ।

अनुसन्धानमा संलग्न अधिकृतहरुका अनुसार डाक्टरको नम्बरमा फोन र म्यासेज गरेर उनीहरुले पटकपटक अस्पतालमा बम राख्ने धम्की दिँदै आएका थिए । अस्पताल र घर परिवार सुरक्षित राख्ने भए ३ करोड तयार गर्नु भनेर उनीहरुले धम्की दिएको अडियो पनि प्रहरीले फेला पारेको छ ।

बम जस्तो वस्तु राखेर रिसेप्सनमा खबर

बिहीबार बिहान १०ः१० बजे अस्पतालका रिसेप्सनिष्ट पूर्णबहादुर दोङलाई मोबाइलमा फोन आयो– ‘तपाईंहरु २ मिनेटभित्र बाहिर जानुस्, अस्पतालमा बम राखेका छौं ।’ दोङले सुरुमा कसैले ठट्टा गरेको होला भन्ने सोचे । नपत्याए तेस्रो तलाको बाथरुममा गएर हेर्न भनियो ।

लगत्तै अस्पतालका अध्यक्ष सुरज श्रेष्ठ र मेडिकल डाइरेक्टरलाई उनले जानकारी गराए । बाथरुममा जाँदा कमोड पछाडि बम जस्तो देखिने वस्तुमा रातो बत्ती पिलिक–पिलिक बलिरहेको देखियो । अध्यक्ष श्रेष्ठले त्यहीँबाट प्रहरी कन्ट्रोल १०० मा फोन गरे । एसएसपी सिंह, प्रहरी उपरीक्षक (एसपी) रमेश बस्नेत लगायतको टोली घटनास्थलमा पुग्यो । नेपाल प्रहरी केन्द्रीय कार्यदल र नेपाली सेनाको बम डिस्पोजल युनिट पनि त्यहाँ पुग्यो ।

टोलीले घटनास्थल सुरक्षित राखेर सूचना संकलन गर्दै जाँचबुझ ग¥यो । ‘सेनाको टोलीले जाँच्दा त्यो बस्तु बम नभएको पुष्टि भयो’– एसएसपी सिंह भन्छन्– ‘खासमा तर्साउन मात्र राखिएको रहेछ, त्यसपछि राख्ने व्यक्तिबारे अनुसन्धान सुरु भयो ।’

डाक्टरको परिवार सिध्याउने धम्की

बम राखिसकेपछि अस्पतालका डाक्टरलाई दुई पटक म्यासेज गरिएको देखिन्छ । १०ः०० बजे म्यासेज गरेर ‘३० मिनेटपछि कल गर्छु, यदी प्रहरीलाई भनिस् भने बम चाँडै विष्फोट हुन्छ’ भनिएको छ ।

आधा घन्टापछि अर्को म्यासेज पठाएर अस्पतालको सटर बन्द गर्न भनिएको छ । ‘सटर डाउन चाँडो गर नत्र, विष्फोट गरिदिन्छौं, कोही बच्दैनस् पुलिसलाई खबर भयो भने’ दोस्रो म्यासेजमा भनिएको छ ।

एसएसपी सिंहका अनुसार उनीहरुले आफूहरुसँग बमको रिमोट भएको भन्दै ४ वटा बम घरमा वा अन्यत्र पनि हुनसक्ने दाबी गरेका थिए । ‘अस्पताल र तपाईंको घर परिवार समेतलाई अत्यन्त खतरा छ, भनेको नमाने ध्वस्त पारिदिन्छु भन्दै धम्क्याइएको पाइएको छ’ सिंहले भन्छन् ।

धम्कीबारे थाहा पाएलगत्तै मोबाइल ट्याकिङ, कल डिटेल रेकर्ड लगायतको प्राविधिक विश्लेषण गरेर शंकास्पद व्यक्तिलाई निगरानीमा राखिएको सिंह बताउँछन् । त्यसक्रममा शनिबार तीनै जना अभियुक्तलाई समात्न सफल भएको उनले बताए ।

ऋण तिर्न नसक्दा बने अपराधी

प्रहरीका अनुसार कुँवरले एक सहकारीबाट १७ लाख रुपैयाँ ऋण लिएका थिए । तर चुक्ता गर्न सकेनन् । दाजुभाइले बेल्जियम जान पनि ‘एप्लाई’ गरेका थिए । तत्काल तिर्नुपर्ने रकम थिएन ।

‘आर्थिक समस्यामा परेका कारण तीन जनाले गलत बाटो रोजेको देखिन्छ’ सिंह भन्छन्– ‘कानून अनुसार अदालतबाट म्याद थप गरेर विस्तृत अनुसन्धान गर्छौं ।’

सोमबार, २८ भदौ, २०७८, बिहानको ११:३५ बजे

सम्बन्धित खवर