तपाईंलाई पार्टीबाट निष्कासन किन नगर्ने?– अध्यक्ष उपेन्द्र यादव

३१ जेठ  /  जनता समाजवादी पार्टी (जसपा)बाट सरकारमा सहभागी ११ मध्ये ९ मन्त्रीलाई जसपा अध्यक्ष उपेन्द्र यादव पक्षले स्पष्टीकरण सोधेको छ।
जसपा केन्द्रीय कार्यालय प्रमुख प्रकाश अधिकारीले २९ जेठमा उनीहरूलाई सात दिने स्पष्टीकरण सोधेका हुन। स्पष्टीकरणमा भनिएको छ, “८ जेठ २०७८ मा बसेको केन्द्रीय कार्यकारिणी समिति बैठकमा भएको निर्णयको बुँदा नम्बर ४ बमोजिम तपाईंलाई कारबाही किन नगर्ने?”

८ जेठमा बसेको उपेन्द्र पक्षको बैठकले केपी शर्मा ओली नेतृत्वको सरकारमा सहभागी भएमा पार्टीबाट स्वतः निष्कासन गरिने उल्लेख छ।

त्यही बुँदालाई टेकेर सरकारमा सहभागी सबैलाई पार्टीबाट निकाल्ने उद्देश्यले स्पष्टीकरण सोधिएको हो। जसपाले उपप्रधानमन्त्री राजेन्द्र महतो र भूमि व्यवस्था, गरीबी निवारण तथा सहकारीमन्त्री लक्ष्मणलाल कर्णलाई भने स्पष्टीकरण सोधेको छैन।

यादव पक्षले जसपाका पहिलो वरीयताका अध्यक्ष महन्थ ठाकुर, वरिष्ठ नेता महतो र केन्द्रीय कार्यकारिणी सदस्यद्वय कर्ण र सर्वेन्द्रनाथ शुक्ललाई यसअघि नै निष्कासन गरिसकेको छ। त्यही भएर उनीहरूलाई पुनः स्पष्टीकरण नसोधिएको हो।

निर्वाचन आयोगले भने यादव पक्षले ठाकुरसहित चार नेतालाई गरेको कारबाही र ठाकुर पक्षले यादवलाई गरेको कारबाहीलाई मान्यता नदिने निर्णय गरिसकेको छ।

उपेन्द्र यादव पक्षले सात दिने स्पष्टीकरण सोधेका मन्त्रीहरू

१. शरत्‌सिंह भण्डारी

२.राजकिशोर यादव

३. अनिल झा

४.उमाशंकर अरगरिया

५. एकवाल मियाँ

६. चन्दा चौधरी

७. विमलप्रसाद श्रीवास्तव

८. चन्द्रकान्त चौधरी

९. रेणुका गुरुङ

सोमबार, ३१ जेठ, २०७८, बिहानको ०८:५८ बजे

सम्बन्धित खवर