सातामा १५ सयले बढ्यो सुनको मूल्य

दमक, ३ पुष/   यो सातामा सुनको मूल्य प्रतितोला १५ सय रुपैयाँले बढेको छ । नेपाल सुनचाँदी व्यवसायी महासंघले साताभरमा सुनको मूल्य करिब १५०० रुपैयाँले बढेको जानकारी दिएको छ । गत साताको शुक्रबारदेखि यो साताको शुक्रबारसम्म सुनको मूल्यमा उक्त वृद्धि आएको हो ।
गत साताको शुक्रबार छापावाल सुनको मूल्य प्रतितोला ९२ हजार ५०० रुपैयाँ थियो । जुन, यो साताको शुक्रबारसम्म आइपुग्दा प्रतितोला १५०० ले बढेर ९४ हजार रुपैयाँ पुगेको छ । यस्तै, गत साताको शुक्रबार प्रतितोला ९२ हजार रुपैयाँमा कारोबार भएको तेजाबी सुनको मूल्य हिजो शुक्रबार ९३ हजार ५०० रुपैयाँ पुगेको छ ।
यसका साथै, साताभरमा चाँदीको मूल्य समेत प्रतितोला ६० रुपैयाँले उकालो लागेको महासंघले जानकारी दिएको छ । चाँदी गत साताको शुक्रबार प्रतितोला ११ सय ९० रुपैयाँमा कारोबार भएको थियो । जुन, हिजो शुक्रबार तोलामा १२ सय ५० रुपैयाँ कायम भएको महासंघले बताएको छ ।

शनिबार, ०३ पुष, २०७८, दिउँसोको ०३:५५ बजे

सम्बन्धित खवर