तेलको ग्यालेनभित्र राखेर लागुऔषधको ओसारपसार

बैकल्पिक खवर

विराटनगर / सुरक्षाकर्मीलाई छल्नका लागि लागुऔषध ओसारपसार गर्ने गिरोहले अनेक उपाय लगाउन थालेका छन् ।
नेपाल-भारत सीमा क्षेत्रमा गरिएको सुरक्षा कडाइपछि कानुनद्धारा बर्जित लागुुऔषध ओसार्न गिरोहले विभिन्न उपाय अवलम्बन गर्न थालेका हुन् । भारतीय बजार जोगवनीबाट नेपालतर्फ लागुऔषधको अवैध ओसारपसार हुने गरेको छ ।
खाने तेलको ग्यालेनभित्र राखेरसमेत लागुऔषधको ओसारपसार हुने गरेको तथ्य फेला परेको छ । ग्यालेनमा तेल ल्याएजस्तो देखाएर लागुऔषध ल्याउने गरिएको प्रहरीले पत्ता लगाएको हो । खाने तेलको ग्यालेनमा राखेर लागुऔषध लिएर आउँदै गर्दा विराटनगरबाट प्रहरीले मङ्गलबारसाँझ एक जनालाई पक्राउ गरेको छ । जोगवनीबाट लागुऔषध लिएर आउँदै गरेको अवस्थामा विराटनगर महानगरपालिका-१६ दक्षिण गेटबाट ३२ वर्षीय राजकुमार मगर पक्राउ परेका हुन् ।
प्रदेश १ प्रहरी कार्यालय विराटनगरका प्रवक्ता एसपी महेन्द्रकुमार श्रेष्ठका अनुसार सुनसरी चक्रघट्टीका मगरले ग्यालेनमा तेल राख्दै त्यहाँभित्र लागुऔषध हालेर ल्याएको खुलेको छ । उनका अनुसार मगरले बोकेको ग्यालेनभित्रबाट लागुऔषध एभिल ७७ एम्पुल, लुपिजेसिक ७५, डाइजेल्याप ७५ र फेनारगन ७८ एम्पुल बरामद भएको छ ।
उनलाई लागुऔषध नियन्त्रण ब्युरो विराटनगरको टोलीले पक्राउ गरेको हो । पक्राउ परेका मगरविरुद्ध इलाका प्रहरी कार्यालय रानीले लागुऔषध ऐनअन्तर्गतको मुद्दा चलाउने तयारी गरेको छ ।

बुधबार, ०९ असार, २०७८, रातीको ०९:०७ बजे

सम्बन्धित खवर