झापा /   सुजिता आत्महत्याको कारण हाडनाता प्रेम भएको प्रहरीले गरेको अनुसन्धानबाट खुलेको छ । चितवनकी सुजिता भण्डारी बेपत्ता भएपछि अनुसन्धान थालेको प्रहरी सुजिताका दाजुलाई पक्राउ गरेको जनाएको छ ।
परिवारले पनि प्रहरी अनुसन्धानप्रति समर्थन जनाउँदै आत्महत्या दुरुत्साहनको कसूरमा नाताभित्रकै प्रेमीविरुद्ध जाहेरी दिएको छ । सुजिता भण्डारीका काकाको छोरा झापा शरणामतीका सचिन भनिने सुकदेव भण्डारीविरुद्ध परिवारले जाहेरी दिएपछि उनी पक्राउ परेका छन् ।
अपहरण भएको भनिएका वेला उनले मोबाइलमा लामो समय ‘डाटा’ प्रयोग देखियो, ‘पूर्वतिर’ गएको भन्दै सन्देश पठाउँदा मोबाइलमा चितवनकै टावर सक्रिय देखियो ।
भण्डारीको अपहरण नै नभएको आशंकामा खोजविन गरिरहेको प्रहरीलाई झस्काउने घटना ९ दिनपछि सतहमा आयो । ब्रह्मायणी सामुदायिक वनमा भण्डारीको शव २० असारमा भेटिँदा घटनाले रहस्यमय मोड लियो ।
स्थानीयले भण्डारीको हत्या भएको र सत्यतथ्य सार्वजनिक गर्न माग गर्दै आन्दोलन गरे । तर शव नजिकै विषको बट्टा पनि देखिएकाले आत्महत्या हुनसक्ने संकेत पनि देखियो ।
झण्डै एक महीनापछि शुक्रबार पत्रकार सम्मेलन गरेर प्रहरीले भण्डारी मृत्यु प्रकरणको पटाक्षेप भएको दाबी गरेको छ । चितवनका एसपी ओम अधिकारीले प्रेम सम्बन्ध असफल भएपछि सुजिताले दाजुसँग विवाह गर्न गरेको प्रयत्न असफल भएपछि आत्महत्या गरेको बताएका छन् ।
काठमाडौंमा सँगै बसे
काठमाडौंमा बीबीएस अध्ययन गर्ने सुकदेवको कान्छो काकाकी छोरी हुन्, सुजिता । प्रहरीका अनुसार नुवाकोट पुख्यौली घर भएका भण्डारी परिवारका सदस्यमध्ये सुजिताको बुबा यज्ञबहादुर भण्डारी चितवन र सुकदेवका बुबा झापाको शरणामतीमा बसाइँ सरेर गएका थिए ।
दाजुभाइ टाढाटाढा बसाइँ सरेपछि पहिले उनीहरुको भेटघाट पातलिएको थियो । तर पछिल्ला वर्षहरुमा फेसबुकमार्फत दुईबीचको सम्बन्ध घनिष्ठ बनेको थियो, त्यहीबीच सामाजिक सञ्जालबाटै प्रेम भयो ।
प्रहरीका अनुसार परीक्षा दिएर खाली रहेको समयमा उनी दिदीकहाँ बस्ने भन्दै काठमाडौं पनि गएकी थिइन् । सुकदेव पनि काठमाडौंमै अध्ययन गरिरहेका थिए । त्यसपछि दिदीसँग नभइ उनी सुकदेवसँगै बसिन् ।
प्रेममा सुकदेवले पनि सँगै बस्न इन्कार गरेनन् । सुजिताले उनलाई छुट्टै कोठा खोज्न पनि भनेको भेटिएको चितवनका डीएसपी सूर्य थापा बताउँछन् । तर लकडाउन भएपछि सुजिता चितवन फर्किएकी थिइन् ।
त्यहीबीच उनले सुकदेवसँग बिवाहको प्रस्ताव पनि राखिन् । त्यसपछि सुकदेव झस्किए । पारिवारिक खटपट हुने र सामाजिकरुपमा पनि समस्यामा हुने भन्दै उनी पछि हट्न खोजे ।
त्यसपछि दुईबीचको सम्बन्धमा दरार आयो । त्यसो त त्यसअघि प्रेम सम्बन्धलाई कसरी विवाहमा बदल्ने भनेर उनीहरुले विभिन्न विकल्पमा पनि छलफल गरेको देखिएको डीएसपी थापा बताउँछन् ।
विदेश जाने, भाग्ने वा अपहरणको बाहना बनाएर गायब हुने योजना पनि बनेको युवकले बयानमा खुलाएको प्रहरी बताउँछ ।
डीएसपी थापाका अनुसार सुजिताले ‘विवाह गर्न नमाने मर्छु’ समेत भन्ने गरेकी थिइन् । त्यहीबीच ९ असारमा उनीहरुबीच विवाहकै विषयमा झगडा भयो । सुकदेले ‘जे मन लाग्छ, गर’ भनिदिए । त्यसपछि नै उनले नजिकै रहेको सामुदायिक वनमा गएर विष सेवन गरेको हुनसक्ने प्रहरीको भनाइ छ ।

सुजिताको पोष्टमार्टम रिपोर्टले उनको शरीरमा बाहिरी चोटपटक नभएको देखाएको छ ।

Facebook Comments Box