जसपाको कार्यसमितिमा १३ जना महिला

काठमाडौं, ८ मंसीर/   जनता समाजवादी पार्टी नेपाल (जसपा)ले कार्यकारिणी समिति विस्तार गर्न लागेको छ । हाल जसपाको कार्यकारिणी समिति ३५ सदस्यीय रहेकामा बढाएर ५३ सदस्यीय बनाउन लागिएको हो । पार्टीले १८ जना थपेर ५३ सदस्यीय कार्यकारिणी समिति सदस्य बनाउन गृहकार्य थालिसकेको छ ।
मंसिर ५ गतेदेखि चलिरहेको कार्यकारिणी समितिको बैठकमा त्यस बारेमा छलफल सुरु भएको कार्यकारिणी सदस्य रामनरेश रायले बताए । यस विषयमा समितिका सदस्यहरुले आआफ्नो धारणा राख्ने क्रम जारी रहेको उनको भनाइ छ ।
जसपाले कार्यकारिणी समिति विस्तार गर्दा १८ जनामध्ये १३ जना महिला राख्नुपर्ने हुन्छ । संविधान अनुसार ३३ प्रतिशत महिला अनिवार्य राख्नुपर्ने भएकाले १३ जना अनिवार्य रुपमा महिला समावेश गर्नुपर्ने बाध्यतामा जसपा परेको हो ।
५३ को ३३ प्रतिशत १८ हुन्छ । १८ जना महिनामध्ये अहिले जसपाको कार्यकारिणी समितिमा ५ जना महिला मात्र छन् । अब १८ संख्या पुर्याउन १३ जना महिला कसरी छनौट गर्ने भन्ने विषयमा छलफल चलिरहेको छ ।

बुधबार, ०८ मंसिर, २०७८, बिहानको ११:०१ बजे

सम्बन्धित खवर