साँच्चै एकता चाहेको भए ओलीले राजीनामा दिन सक्नुपर्छ– नेपाल

काठमाडौं, १४ साउन/    नेकपा एमालेका नेता माधवकुमार नेपालले केपी शर्मा ओलीले साँच्चै एकता चाहेको भए दोस्रो पुस्ताका नेतालाई अध्यक्ष बनाउन तयार हुनुपर्र्ने बताएका छन् । उनले ओलीले राजिनामा दिएर दोस्रो पुस्तालाई अध्यक्ष बनाउयन तयार भए एकताको बाटो खुल्ने पनि विश्वास ब्यक्त गरेका छन् ।
नेकपा एमालेका बरिष्ठ नेता माधवकुमार नेपालले आगामी महाधिवेशनसम्म दुईजना अध्यक्ष बनाउने ओली पक्षको प्रस्तावप्रति सकारात्मक बन्न सकिने जनाऊ दिएका छन् । तर, दोस्रो अध्यक्षमा आफ्नो रुची नरहेको भन्दै नेता नेपालले झलनाथ खनाल, अष्टलक्ष्मी शाक्य वा युवराज ज्ञवालीलाई अध्यक्ष बनाउन सकिने बताएका छन् ।

माधव पक्षको पछिल्लो स्थायी कमिटी बैठकमा नेता नेपालले ओलीसँग दोस्रो अध्यक्ष बन्ने आफूमा कुनै रुची नरहेको स्पष्ट पारे । तर, सबैको सहमति भएमा महाधिवेशनसम्म दुईजना अध्यक्ष बनाएर अघि बढ्ने प्रस्तावमा आफ्नो सहयोग रहने नेता नेपालले आफ्नो समूहको बैठकमा बताए ।

‘माधव कमरेडले केपी ओलीसँग दोस्रो अध्यक्ष बन्न आफ्नो रुची छैन भन्नुभयो,’ एक स्थायी कमिटी सदस्यले भने, ‘झलनाथ खनाल, अष्टलक्ष्मी शाक्य वा युवराज ज्ञवालीलाई अध्यक्ष बनाएर सहमति हुन्छ भने आफ्नो आपत्ति नरहने माधव कमरेडले बताउनुभएको छ ।’

भीम रावल, घनश्याम भुसाल, सुरेन्द्र पाण्डे लगायतका दोस्रो पुस्ताका नेताहरु नै दोस्रो अध्यक्ष बनेर सहमति जुट्छ भने पनि त्यसमा आफ्नो सहयोग हुने नेता नेपालले बैठकमा बताएका थिए । बैठकमा नेपालको भनाइ थियो, ‘तपाईहरु अध्यक्ष बन्नोस्, यसमा मेरो सहयोग रहन्छ, तर दोस्रो अध्यक्ष बन्ने मेरो रुची छैन ।’

बैठकमा सहभागी एमाले नेताका अनुसार पार्टीको एकल नेतृत्व गर्नुपर्ने अवस्था आएमा माधव नेपाल त्यसका लागि तयार छन् । त्यस्तै, महाधिवेशन जितेर अध्यक्ष बन्न पनि उनी तयार देखिएका छन् । तर, अन्तरिम कालमा ओलीसँग दोस्रो अध्यक्ष नबन्ने उनको अडान छ । तैपनि पार्टी एकतावद्ध हुन्छ भने आफ्नो समूहबाट अरु कसैलाई ओलीसँगै अध्यक्ष बनाएर महाधिवेशनसम्म जान सकिने नेता नेपालको स्वीकारोक्ति रहेको नेताहरु बताउँछन् ।

बिहिबार, १४ साउन, २०७८, बिहानको ०७:५१ बजे

सम्बन्धित खवर